គោលនយោបាយ -ការរស់នៅ គោលនយោបាយ

02/06/2025 - 10:35

ជំរុញការប្រើប្រាស់ផលិតផលតំបន់ជនជាតិភាគតិចនៅខេត្តអាងយ៉ាង

ជាមួយនឹងលក្ខណៈធម្មជាតិ និងវប្បធម៌ដ៏ពិសេសដោយឡែក តំបន់ជនជាតិភាគតិចនៅខេត្តអាងយ៉ាង មានផលិតផលកសិកម្ម និងសិប្បកម្មប្រពៃណីពិសេសៗជាច្រើន ដូចជាស្ករត្នោត នំក្រៀប ក្រមា សំពត់ហូល។ល។ នេះជាសក្តានុភាពដ៏ល្អសម្រាប់អភិវឌ្ឍសេដ្ឋកិច្ចភូមិភាគ និងបង្កើនប្រាក់ចំណូលជូនប្រជាជន។

សកម្មភាពផលិតនៅក្រុមហ៊ុនភាគហ៊ុន Palmania។

យោងតាមលោក ហ្វិញង៉ុកហូ នាយករងមន្ទីរឧស្សាហកម្មនិងពាណិជ្ជកម្ម ខេត្តអាងយ៉ាង បានឱ្យដឹងថា ទោះបីជាមានឧត្តមភាពជាច្រើនក៏ដោយ បុ៉ន្តែភាគច្រើនផលិតផលពិសេសរបស់ជនជាតិភាគតិចនៅខេត្តអាងយ៉ាង នាបច្ចុប្បន្ននៅតែបានផលិតដោយលក្ខណៈតូចតាច ធ្វើដោយដៃ ខ្វះស្តង់ដារលើការវេចខ្ចប់ ស្លាកសញ្ញានិងវិញ្ញាបនប័ត្រគុណភាព។ គ្រួសារជាច្រើននៅតែលក់ទំនិញតាមរយៈឈ្មួញកណ្តាលតម្លៃមិនលំនឹង ហើយពួកគាត់មិនទាន់ទទួលបានបណ្តាញចែកចាយទំនើបនៅឡើយ។ល។ ដូច្នេះ ហើយអស់រយៈពេលជាច្រើនឆ្នាំមកនេះ ខេត្តអាងយ៉ាងបានអនុវត្តល្អនូវកម្មវិធីជំរុញការប្រើប្រាស់ផលិតផលនៅតំបន់ជនជាតិភាគតិច។

លោកស្រី ចូវង៉ុកយ៉េវ ម្ចាស់ក្រុមហ៊ុនភាគហ៊ុន Palmania បានចែករំលែក៖ ចាប់ពីឆ្នាំ ២០២២ Palmania បានខេត្តឧបត្ថម្ភទឹកប្រាក់ជិត ១៤០ លានដុងពីប្រភពទុនជំរុញកសិកម្មរបស់ភូមិភាគ ដើម្បីអនុវត្តគម្រោង៖ “អនុវត្តគ្រឿងចក្រនិងឧបករណ៍ទំនើបៗក្នុងដំណើរការផលិតស្ករត្នោត”។ អាស្រ័យហេតុនោះ នៅចុងខែកុម្ភៈ ឆ្នាំ ២០២៥ មានផលិតផលចំនួន ៣ គឺ៖ ស្ករត្នោតខាប់ ស្ករត្នោតផែននិងម្សៅស្ករត្នោតត្រូវបានទទួលស្គាល់ជាផលិតផល OCOP លំដាប់ផ្កាយ ៥ ។ នេះជាកម្លាំងចលករដ៏ធំសម្រាប់ Palmania បន្តអភិវឌ្ឍវត្ថុធាតុដើមក្នុងស្រុក ដែលផ្សារភ្ជាប់ជាមួយជនជាតិខ្មែរ នោះគឺដើមត្នោត។ល។

លើសពីនេះ ជារៀងរាល់ឆ្នាំ អាងយ៉ាងនៅទាំងរៀបចំឱ្យបុគ្គល និងអង្គភាពដែលផលិតនិងផ្គត់ផ្គង់កសិផលនិងសិប្បកម្មប្រពៃណីនៅតំបន់ជនជាតិភាគតិច ចូលរួមកម្មវិធីជំរុញពាណិជ្ជកម្ម ជំរុញការប្រើប្រាស់ ចងសម្ព័ន្ធការផ្គត់ផ្គង់និងតម្រូវការទំនិញ។ ខេត្តក៏បានឧបត្ថម្ភដល់អាជីវកម្មដូចជា ផ្សារទំនើបតឺសើុង ផ្សារទំនើបថ្វ័យសើុង Co.opmart ផ្សារទំនើបចើមើុយ Co.opmart ជាដើម ដើម្បីរៀបចំការដឹកទំនិញវៀតណាមទៅកាន់តំបន់ជនបទ ជំរុញការប្រើប្រាស់ ក៏ដូចជា ចូលរួមការចលនា “ប្រជាជនវៀតណាមអាទិភាពប្រើប្រាស់ទំនិញវៀតណាម”។ រូបភាពផ្សព្វផ្សាយ ជំរុញការប្រើប្រាស់ផលិតផលតំបន់ជនជាតិភាគតិចត្រូវបានដាក់បញ្ចូលទៅក្នុងព្រឹត្តិការណ៍ក្នុងស្រុកដូច៖ ស្តង់ឧទ្ទេសនាមផលិតផលពិសេសរបស់ភូមិភាគនៅថ្ងៃព្រឹត្តិការណ៍ធំៗ ដូចថ្ងៃទី ៣០ ខែមេសានិងថ្ងៃទី ១ ខែឧសភា ទិវាបុណ្យជាតិថ្ងៃទី ២ ខែកញ្ញា ជាពិសេសគឺនៅឱកាសពិធីបុណ្យទានរបស់ជនរួមជាតិ ដូច៖ បុណ្យសែនដូនតា រៀបចំបង្ហោះប៉ាល់ឡុង លោតឆ័ត្រយោង បង្ហោះខ្លែងសិល្បៈ។ល។ ទន្ទឹមនឹងនោះ ខេត្តអាងយ៉ាង នៅទាំងផ្សព្វផ្សាយព័ត៌មានជាប្រចាំដល់អង្គការ និងបុគ្គលអំពីគោលបំណង និងអត្ថន័យនៃកម្មវិធី OCOP “ឃុំមួយផលិតផលមួយ” ទាក់ទងនឹងផលប្រយោជន៍តម្លៃសេដ្ឋកិច្ច និងតម្លៃមនុស្សធម៌។ អាស្រ័យហេតុនេះ បានលើកកម្ពស់ការយល់ដឹង បង្កើនការសាយភាយ ការយល់ស្រប និងការចូលរួមយ៉ាងសកម្មនៅក្នុងកម្មវិធី។ សហការបើកវគ្គហ្វឹកហ្វឺនអំពីការលើកកម្ពស់គុណភាពផលិតផលវិធីសាស្ត្រ Livestream ការដាក់លក់លើ TikTok ផ្សារអេឡិចត្រូនិក។ល។

លោកហ្វិញង៉ុកហូ បានចែករំលែក៖ ជំរុញការប្រើប្រាស់ផលិតផលមិនត្រឹមតែជាដំណោះស្រាយសេដ្ឋកិច្ចប៉ុណ្ណោះទេ ថែមទាំងជាមធ្យោបាយថែរក្សាវប្បធម៌ជនជាតិភាគតិចទៀតផង។ ព្រោះផលិតផលនីមួយៗ ដូចជាស្ករត្នោត ក្រមា។ល។ របស់ជនជាតិខ្មែរ បង្កប់នូវតម្លៃប្រពៃណី និងការប្តេជ្ញាចិត្តរបស់ជនជាតិភាគតិច។ ការឧបត្ថម្ភជនរួមជាតិកសាងម៉ាកយីហោ និងបង្ខិតជិតទីផ្សារទំនើប គឺជាមធ្យោបាយមួយដើម្បីបង្កើតមុខរបររកស៊ីជាយូរអង្វែង ទន្ទឹមនឹងនោះ ពង្រីកកម្លាំងផ្ទៃក្នុងសម្រាប់ការអភិវឌ្ឍសេដ្ឋកិច្ច-សង្គម តំបន់ជនជាតិភាគតិចនៅខេត្តអាងយ៉ាង៕

ថាញឡុង -ប្រែសម្រួល៖ សុផន

ចែករំលែកអត្ថបទ

ពាក្យគន្លឹះ